- 香港人的分享平台
立即下載
從 App Store 下載從 Play Store 下載
《G 殺》觀後感(含大量劇透)

「香港本身就係一套悲劇」

我相信係各位觀影的過程中,總會有一啲戲係大家睇唔透的,《G殺》就係其中一套。佢唔係以一個線性的形式敘事,所以睇完之後都仍然要花一段時間將呢啲的劇情碎片一個一個拼合一齊,先會大概了解成個故事係點的。不過,即使你明白個故事,你都未必get 到唔同 「G」之間有咩關係,或者想帶出一個點樣的主題。不過,最近上劇本課,老師講到:其實get 到作者寫劇本時構思的主題係咪真係咁緊要呢?定係,其實我地自己能夠拿走啲咩message,先至係每一個作品對我地的意義呢?

講番套戲,睇緊G殺的時候,我忍唔住會不停係對白或者影像裡面不停搵有關G 的線索,我第一個即刻諗到的會係「Girl」,因為都幾明顯,從《G殺》的海報已經見到成套戲的中心都係圍繞著陳漢娜飾演的雨婷去發展。跟住我會聯想到「港」。因為睇到好多評論都講《G殺》係一個講香港政治現實的故事,所以一定離唔開「香港」兩字。

《G殺》有七個人物:不受歡迎的雨婷、患有亞氏保加症的Don仔,偽教師Markus、雨婷媽媽、雨婷爸爸龍爺、雨婷同學以泰同埋性工作者李小梅。佢地都象徵著香港社會上唔同的人:雨婷就係「Girl」、Don 仔係「Geek」(毒L),老師Markus係「Grownups」、龍爺係「Government」、雨婷同學係「Gentleman」,媽媽就係「Genuine」而李麗梅就係「雞」。佢地的關係錯綜複雜,就好似係我地香港呢個咁細的城市,人與人之間會有好多「common friend」咁。

係呢到,我會儘量試下用自己僅有的智慧去解讀以上的G代表的係咩。首先,雨婷的「Girl」。導演係《G殺》裡面選擇左將陳漢娜的角色雨婷描繪成一個好清純的女學生,但性格卻毫不懦弱。雨婷就好似係裡面其他的女角一樣,渴望得到其他人的愛。而佢亦都好似現代的女性,成日被社會上的人評頭品。例如:比較胸圍的size、比較知名度等。但係,現代的女性就好似呢三個角色般,縱使關係並非友好,但係佢地都以自己的堅毅去面對男人的背叛、拋棄,展現的係絕境中的堅強,就好似片中引用茶花女的選段:「不可小看」。

用「Geek」形容Don 仔並唔係因為佢本身有的亞氏保加症,而係佢係不知不覺間成為了人地的棋子都唔自知。佢雖然表達能力冇咁好,但佢好善良,而當林善的角色被欺負的時候,佢冇加隻腳落去,反而以自己的方法為佢打氣。好多人以「毒L」來稱呼 Geek,但我好唔鍾意呢個稱呼。因為某程度上,好多「毒L」並非真係「毒」,佢地係唔被社會接納的結果。佢地冇出來遊行或者表態,並唔係因為佢地唔關心社會,而係社會根本冇畀機會佢地去參與。

老師Markus代表的就係偽善的成年人。而家好多「Grownup」一般都會係政治表態上選擇中立。其實並唔係因為佢地冇取態。而係佢地唔想面對表態的代價。好似Markus咁,係表面上滿口仁義道德,但實際上都係一個玩弄感情的人渣。老師知道自己有性病,卻仍然搭上雨婷同埋麗梅,對身邊的關係毫無責任。就好似而家坊間好多評論咁講:大人明知政府有問題,但卻推年輕人做出頭鳥,自己係背後坐享其成。佢地會以各種理由去安慰自己的無力,就好似老師係同麗梅做愛的時候唱詩歌一樣。

講起詩歌,我覺得《G殺》亦係罕有對宗教作為自身救贖工具呢個講法作出質疑。當警察審問老師為何要同雨婷跡麗梅同時有關係時,老師係激辯的時候講左一句:「我有帶佢返教會,佢地已經得到救贖!」呢度我會聯想:返教會就係咪能夠洗脫自己的過去?定係其實信主呢個救贖其實只係一個藉口,令充滿罪疚感的人類夜晚訓得舒服啲?

跟住,我想講李小梅的「雞」。係黃璐揪心的演出之下,我地見證一個由內地來港滿腔熱誠的女人,經過香港現實環境的洗禮同埋旁人的道德批判,最終走向無可避免的悲劇。特別佢最後唱《夢》一曲特別令人心痛。當佢問其實佢的舞係咪音樂時,佢其實只係想得到承認,佢自己知道自己的行業唔會得到尊重,但就好似以泰縱使知道音樂冇前途都好,佢都想得到父母支持一樣。小梅,就好似淪落人的菲傭一樣,都有自己的夢想,但可惜的係,佢的歌藝冇得到賞識,唯有淪落風塵。係小梅身上,我睇到的係香港人對「非我族類」的苛刻同埋道德批判。人誰無過?我地又何必將其他人的問題放大呢?一句不留餘地的批評很容易出口,但摧毀的卻係當事人的聲譽同埋尊嚴。最後,小梅的決定正正係對冷漠社會的控訴同埋展現生活的無奈,佢對生命的追求就隨住歲月的磨練一點一點逝去,自殺係逼不得已,亦係無可避免的結局。

我相信對於「一國兩制」的政治隱喻,《G殺》係雨婷媽媽同埋小梅身上表露無遺,由媽媽係2014確診胃癌,到龍爺五湖四海的朋友入侵林善的屋企,甚至將做愛同埋大提琴演奏擺埋一齊,相信觀眾絕對感受到當中的含義,係呢到都唔使畫出腸了。

李卓斌導演以一衆唔同取態、性格的人物將香港的眾生相展現出來,帶出香港不可逆轉的悲劇結局。當credits 出現「GG」兩字,其實導演已經對香港的未來有定論。自殺,係咪香港人面對困境的唯一出路呢?正如雨婷媽媽所講,社會即使經歷時代的變遷,但大自然係永恆不變的,而家可以寄望的,唯有係閉上眼後暫時忘記現實的寧靜。

後按:二刷之後,所有的細節頓然開通,更加睇到導演對人生、香港的種種無奈。或者人生真係如夢,一個噩夢。發完呢個噩夢醒會來會是另一個世界。咁我地係呢個夢做咁多野究竟係為左咩呢?無論你生前係富豪,定係乞丐,其實最後都係殊途同歸,咁我們何必對世間的事如此執著呢?

小王子觀影錄
G殺
撐場精選帖文
【伯恩·安德森】被「世上最美的少年」束縛的人生 魂斷威尼斯以唯美同性角色一舉成名
【伯恩·安德森】被「世上最美的少年」束縛的人生 魂斷威尼斯以唯美同性角色一舉成名
雪話 14 小時前
中國歷史記載中最長壽的三位奇人
中國歷史記載中最長壽的三位奇人
蝦你先生 15 小時前
尚樂廚房新歌🥙🍿:尚樂廚房食完先講🥗🍿
尚樂廚房新歌🥙🍿:尚樂廚房食完先講🥗🍿
尚樂廚房 16 小時前
出色領導者須具備5種領導新技能
出色領導者須具備5種領導新技能
蝦你先生 16 小時前
宗教改革家茨溫利(好消息宣教会资料库)
宗教改革家茨溫利(好消息宣教会资料库)
一粒麦子 2019-10-19
少女愛大叔
少女愛大叔
中年筆耕 2019-10-19